आरोपी रामप्रसादलाई १० दिनको म्याद थप

कृष्णप्रसाद अधिकारी हत्या प्रकरण
सञ्चारपत्र दैनिक
भरतपुर, २३ भदौ
गोरखा फुजेलका कृष्णप्रसाद अधिकारीको हत्या गरेको आरोपमा पक्राउ परेका रामप्रसाद अधिकारीमाथि अनुसन्धान गर्न चितवन जिल्ला अदालतले आइतवार १० दिनको म्याद दिएको छ । न्यायाधीश विनोदमोहन आचार्यले अधिकारीको मुद्दामा अनुसन्धान गर्नुपर्ने भन्दै १० दिन म्याद दिएका हुन् ।   
अदालतबाट म्याद थप गरि हत्या आरोपी रामप्रसादमाथि अनुसन्धान अघि बढाईएकोे जिल्ला प्रहरी कार्यालय, चितवनका प्रहरी उपरीक्षक प्रद्युम्न कार्कीले जानकारी दिए । ‘आरोपी सबैलाई २५ दिन भित्रै पक्राउ गरेर मुद्धा चलाउने कोशिसमा छौं’ प्रहरी उपरीक्षक कार्कीले भने । निष्पक्ष अनुसन्धानको लागि चितवन प्रहरी सक्रिय रहेको कार्कीले बताए ।
रामप्रसादलाई प्रहरीले उच्च सुरक्षा सतर्कताका साथ अदालत पु¥याएको थियो । शनिवार सार्वजनिक बिदा परेकोले अधिकारीलाई आइतवार अदालतमा पेस गरिएको हो । काठमाडौंमा कम्युनिकेशन व्यवसाय सञ्चालन गरिरहेका गोरखा फुजेलका ३५ वर्षीय रामप्रसादलाई चितवन प्रहरीले गत शुक्रवार काठमाडौंको बागबजारबाट प्रक्राउ गरेको थियो । प्रहरीले उनलाई त्यसैदिन चितवन ल्याएको थियो ।
कृष्णप्रसाद अधिकारीलाई माओवादी कार्यकर्ताले २०६१ जेठ २४ मा चितवनमा हत्या गरेका थिए । १८ वर्षीय अधिकारी रत्ननगरमा रहेका हजुरबुबा र हजुरआमालाई भेट्न आएका बेला माओवादीका कार्यकर्ताले सुराकीको आरोपमा हत्या गरेका थिए । जेठ २३ गते चितवन आएका उनको जेठ २४ गते दिउँसो अपहरणपछि हत्या भएको थियो । हत्या लगत्तै बाबु नन्दप्रसादले जेठ २५ मा चितवन प्रहरीमा ठाडो उजुरी दिएका थिए ।
२०६२ मंसिर २६ मा कृष्णप्रसादका दाजु नुरप्रसादले हत्यामा संलग्नहरुको विवरण सहित किटानी जाहेरी दिएका थिए । चितवन जिल्ला अदालतका श्रेष्तेदार दिनबन्धु बरालका अनुसार अनुसन्धान अघि बढाईएको मुद्धाको जाहेरीमा छविलाल पौडेल, अजिव भनिने पर्शुराम पौडेल, विष्णु तिवारी, मेघनाथ पौडेल, शुभद्रा तिवारी, सीता अधिकारी, हिमलाल अधिकारी, भीमसेन पौडेल, कालीप्रसाद अधिकारी र दुई जना रामप्रसाद अधिकारीको नाम उल्लेख छ ।