प्रवीण दत्त
रत्ननगर, १६ भदौ
व्यवसायिक केरा खेतीबाट राम्रो आम्दानी हुन थालेपछि यसतर्फ पूर्वी चितवनका किसानहरुको आकर्षण बढेको छ ।
रत्ननगर नगरपालिका, पदमपुर, जयमङ्गला, पिठुवा, जुटपानी लगायतका कृषकहरुले व्यवसायिक रुपमा गरेको केराखेतीबाट अहिले मुलुककै ५० प्रतिशत बजार धानेको जिल्ला कृषि विकास कार्यालयले जनाएको छ । व्यवसायिक रुपमा केराखेती थाल्नु अघि थुप्रै चुनौती खेप्न बाध्य यहाँका कृषकहरुले अहिले उत्पादन र बजार राम्रो पाउन थालेपछि उत्साहित बनेका छन् ।
कृषकहरुका अनुसार भारतबाट आउने केरा बन्द गर्न सके मुलुकमै उत्पादन भएको केराले पुरै बजार धान्न सकिने अवस्था छ । यहाँका कृषकहरुले राम्रो आम्दानी लिन थालेपछि अहिले अन्य कृषि पेशामा लागेकाहरु पनि केरा खेती तर्फ आकर्षित हुन थालेका छन् ।
केरा व्यवसायी संघ चितवनका अनुुसार एक वर्ष अघिसम्म व्यवसायिक केरा खेती गर्ने किसानको संख्या २ सय ५० को हाराहारिमा भएपनि अहिले त्यो संख्या बढेर ३ सय ७५ भन्दा बढी पुगेको छ ।
केरा खेतीले तान्यो किसानको मन
सौराहामा स्टार लेभलको होटल
सौराहा, १६ भदौ
मुलुककै तेश्रो पर्यटकीय नगरि चितवनको सौराहामा करिव १६ करोड रुपैयाँको लगानीमा अत्याधुनिक तवरले निर्माण गरिएको ‘सेभेन स्टार’ नामको होटल आईतबारदेखि सञ्चालनमा आएको छ । उक्त होटलमा जिल्लामै पहिलो पटक मिनी क्यासिनो पनि राखिएको छ ।
सेभेन स्टार होटलका सञ्चालक माधव दुवाडीका अनुसार यो होटल चितवनकै पहिलो स्टार लेभलको होटल हो । आफुहरुले स्टारका लागि चाहिने सबै मापदण्ड पुरा गरिसकेकाले आफ्नो होटल ‘टुस्टार’ भएको उनले बताए ।
चितवन कुमरोजका दुवाडीले आफु र डा. नुरदेव प्रसाद कंडेलले संयुक्त लगानी गरेर होटल सञ्चालनमा ल्याएको बताए । सञ्चालकले स्टार लेभलको लागि चाहिने प्रमाणपत्रको प्रक्रियामा आफुहरु गईसकेकाले चाँडैनै ल्याउने दाबी गरेका छन् ।
होटलको आईतबार एक समारोह बीच होटल एशोसियसन अफ नेपालका केन्द्रिय अध्यक्ष श्यामसुन्दर लाल कक्षपतिले उद्घाटन गरे । होटलको मुख्य आकर्षणको रुपमा मिनि क्यासिनो र करिब ७ सयजना भन्दा बढी अटाउने सेमिनार हल रहेको छ । होटल सञ्चालकले होटल परिसरको क्यासिनो आफुहरुको व्यवस्थापनमा नभई अरुले नै भाडामा लिई सञ्चालन गरेको बताए । ‘हयाप्पी आवर’ को नामबाट सञ्चालित मिनी क्यासिनो भने होटल उद्घाटन नहुँदै सञ्चालनमा आइसकेको छ ।
सञ्चारपत्र दैनिक
